پھر چراغ لالہ سے روشن ہوئے کوہ و دمن
مجھ کو پھر نغموں پہ اکسانے لگا مرغ چمن
پھول ہيں صحرا ميں يا پرياں قطار اندر قطار
اودے اودے ، نيلے نيلے ، پيلے پيلے پيرہن
برگ گل پر رکھ گئي شبنم کا موتي باد صبح
اور چمکاتي ہے اس موتي کو سورج کي کرن
حسن بے پروا کو اپني بے نقابي کے ليے
ہوں اگر شہروں سے بن پيارے تو شہر اچھے کہ بن
اپنے من ميں ڈوب کر پا جا سراغ زندگي
تو اگر ميرا نہيں بنتا نہ بن ، اپنا تو بن
من کي دنيا ! من کي دنيا سوز و مستي ، جذب و شوق
تن کي دنيا! تن کي دنيا سود و سودا ، مکروفن
من کي دولت ہاتھ آتي ہے تو پھر جاتي نہيں
تن کي دولت چھاؤں ہے ، آتا ہے دھن جاتا ہے دھن
من کي دنيا ميں نہ پايا ميں نے افرنگي کا راج
من کي دنيا ميں نہ ديکھے ميں نے شيخ و برہمن
پاني پاني کر گئي مجھ کو قلندر کي يہ بات
تو جھکا جب غير کے آگے ، نہ من تيرا نہ تن
